تايه في بلاد غريبة و مش عارف رايح فين
طريقي سكته سودة و ضلمة من الناحيتين
مش باينله أي ملامح لما هكبر هكون إيه
هبقى حتة كلب صايع ولا باشا ولا بيه
ماشي و بسعى و خلاص و مش عارف إمتى هوصل
و هل هكمل سكتي ولا ممكن إني ما أقدر
مش عارف العيب مني ولا العيب في البلد
إكمني ملقتش لحلمي كتف عليه يتسند
كتير قالولي سافر كتير قالولي هاجر
قالولي جواك موهبة و شخصية حد نادر
دورت كتير على نَفّسي لكن مش لاقي نَفّسي
مشيت في طريقي و جريت لحد ما أتقطع نَفَسي
دورت كتير علي شغل ينفع منه إني أحوش
أصرف منه على أهلي و مراتي لما أتجوز
من شغل لشغل بتنقل و مش لاقي اللي يناسبني
عشان لما أكبر أبقى واجهة مشرفة لإبني
و محرموش في يوم من حاجه و يجي و يعاتبني
و لما يكبر يعوض نقصه و يسافر و يسيبني
و أعيش وحيد في الدنيا دي و من بعده أتكسر
و قلبي على أبني الوحيد اللي في الغربة يتقهر
مش عايز أوصل لكده عشان كده لازم أتعب
أدور على شغل حلال أقدر منه إني أكسب
و تبقى قصة كفاح الكل منها يتعلم قبل ما يفوت الأوان و على اللي راح أتندم
